اسلام آباد – 10 نومبر (اي پي پي) وزيراعظم شاهد خاقان عباسي ۽ چيف آف آرمي اسٽاف جنرل قمر جاويد باجوه چڙي ڪوٽ سيڪٽر ۾ لائين آف ڪنٽرول جو دورو ڪيو. آزاد ڪشمير جو وزيراعظم راجا فاروق حيدر پڻ ان موقعي تي موجود هو. آءِ ايس پي آر پاران جاري بيان موجب جنرل آفيسر ڪمانڊنگ وزيراعظم کي لائين آف ڪنٽرول تي صورتحال، ڀارت پاران سيزفائر جي خلاف ورزيون ڪندي شهرين کي نشانو بڻائڻ ۽ پاڪ فوج پاران پيشيواراڻي انداز ۾ منهن ٽوڙ جواب ڏيڻ بابت بريفنگ ڏني. وزيراعظم بيگناهه شهرين کي نشانو بڻائڻ جي ڀارتي غيرپيشيواراڻي اپروچ جي مذمت ڪندي چيو ته پاڪستان ڪشميري عوام جي منصفاڻي جدوجهد جي لاءِ پنهنجي اخلاقي، سفارتي ۽ سياسي حمايت جاري رکندو. ڀارتي گولاباري سبب شهيد ٿيندڙن جي خاندانن ۽ زخمين سان ملاقات ڪندي وزيراعظم انه جي حوصلي ۽ عزم کي ساراهيو.
