اسلام آباد ۔ 10 جنوری (اے پی پی) وزیرمملکت برائے وفاقی تعلیم تے پیشہ وارانہ تربیت انجینئر محمد بلیغ الرحمٰن آکھیا جو نویں قومی تعلیمی کوں سارے صوبیاں اتے سٹیک ہولڈر دے گٹھ جوڑ نال اخیری شکل ڈتی ویسی۔منگل کوں انہاں اے گالھ قومی تعلیمی پالیسی2009ء دے جائزہ سانگے تھیونڑ آلے ڈو ڈینھ وار اجلاس دے افتتاحی سیشن نال خطاب کریندیں ہوئیں آکھی۔انہاں آکھیا جو پالیسی بہتری آلے پاسے ٹردی پئی اے۔ویلھے نال تھیونڑ آلی تبدیلیاں دے مطابق آپنڑے آپ کو ڈھالنڑ عقلمندی اے۔بلیغ الرحمن آکھیا جو تعلیم دے شعبے اچ بہتری امدی پئی اے ،سکول ونجنڑ دی عمر دے سکولاں توں باہر بالاں دی تعداد اچ نشابر گھٹکی امدی پئی اے جیڑھی جو ہک حوصلہ افزاء گالھ اے۔سرکاری سکولاں دے معیار اچ چنگائی آئی اے جئیں پاروں والدین بالاں کوں نجی سکولاں توں سرکاری سکولاں اچ داخل کرویندے پئن ۔انہاں آکھیا جو 18ویں ترمیم دے بعد تعلیم صوبیاں کوں منتقل تھئی تاں قومی تعلیمی پالیسی جیڑھی جو متفقہ طور منظور کیتی گئی ہئی دا نویں سروں جائزہ دی لوڑھ محسوس تھئی۔انہاں آکھیا جو ہر چیز اچ بہتری دی گنجائش موجود ہوندی اے۔سارے صوبیاں کوں تجویزاں اتے ان پٹ دے بعد نویں قومی تعلیمی پالیسی کوں اخیری شکل ڈتی ویسی تانجو ملک اچ تعلیم دے شعبے کوں چنگا بنڑایا ونج سگے۔انہاں آکھیا جو وفاقی حکومت جی ڈی پی دا2.5فیصد تعلیم تے خرچیندی پئی اے۔ایں موقع تے وزارت وفاقی تعلیم و پیشہ وارانہ تربیتدکے ایڈوائزر رفیق طاہر اتے چوہدری منیر قومی تعلیمی پالیسی2009ء دے اغراض و مقاصد اتے خدوخال بارے اجلاس کوں ڈسایا۔
