شینزن ۔5جون (اے پی پی):وفاقی وزیر خزانہ و محصولات سینیٹر محمد اورنگزیب آکھیے کلی معیشت دے استحکام کوں پائیدار بنیاداں تے ٹورݨ حکومت دے بنیادی اہداف اچ شامل اے۔ انتظامی اقدامات اتے ڈھانچہ جاتی تبدیلیاں پاروں پاکستانی کرنسی مستحکم اے، وزیراعظم دے ایجنڈے دے تحت معیشت دی ترقی اچ حکومت کائنی بلکہ نجی شعبہ اپݨا کلیدی کردار ادا کریسی ، آندے مالی سال اچ پانڈ ابانڈ جاری کریسوں۔ چینی تاجراں تے سرمایہ کاراں کوں پاکستان اچ آپݨی سرمایہ کاری کوں ودھاوݨاں چاہیدے ۔ چین دے شہر شینزن اچ پاک چین بزنس کانفرنس توں خطاب کریندے ہوئیں وزیر خزانہ آکھیے کلی معیشت دے اشاریے مثبت اتے سدھے پاسے ویندے پئن ۔ اڄوکے سال پاکستان اچ زراعت دی ترقی دی شرح 6.2 فیصد اے، میکوں یقین اے جو وݙیاں صنعتاں دی پیداوار تے خدمات دے شعبہ اچ اے رجحان جاری رہسی ، مالی لحاظ نال استحکام اتے نظم و ضبط کوں یقینی بݨایا ڳئے ، پرائمری بیلنس فاضل اے، حسابات جاریہ دے کھاتیں دے خسارے گھٹ تھئن ، ترسیلات زر اتے برآمدات ودھدیاں پئن ۔ اڄوکے سال حسابات جاریہ دے کھاتیں دا خسارہ ھک ارب ڈالر توں گھٹ ہوسی ، برآمدات اچ ٹیکسٹائل دے علاوہ زراعت اتے آئی ٹی دا حصہ وی ودھدا پئے انہاں آکھیے انتظامی اقدامات اتے ڈھانچہ جاتی تبدیلیاں پاروں پاکستانی کرنسی مستحکم اے، کرنسی مارکیٹ اچ قیاس آرائیاں کوں گھٹ کرݙتا ڳئے ، سٹیٹ بینک کنے زرمبادلہ دے ذخیرے 9 ارب ڈالر توں ودھ ڳئن جیڑھے ݙو مہینے دی برآمدات سانڳے کافی ہن ۔ وزیر خزانہ آکھیے پاکستانی معیشت اچ افراط زر ھک حقیقی مسئلہ اے، افراط زر گھٹدی پئی اے ۔ گزریل سال افراط زر دی شرح 38 فیصد ہئی جیرھی جو سال 11 فیصد دی سطح دے نیڑے ہے ، نہ صرف صارفین سانڳے قیمتاں دے اشاریے بلکہ خوراک دے افراط زر اچ وی گھٹکی تھئی اے ، پالیسی ریٹ گھٹݨ نال معیشت تے چنڳے اثرات پوسن ۔ مارکیٹ اچ مثبت رجحان ݙیکھݨ اچ آندا پئے جیڑھا جو پاکستانی معیشت تے سرمایہ کاراں دے اعتماد دی عکاسی کریندا پئے ۔
