مظفر آباد۔15دسمبر(اے پی پی)نگران وزیراعظم انوار الحق کاکڑ آکھیے جو ساݙی دفاعی صلاحیت پاروں کہیں دی لیاقت نئیں جو او پاکستان دو اکھ چاء تے ݙیکھے، اقوام متحدہ دیاں قرارداداں اتے کشمیری عوام دی سک دے مطابق استصواب رائے دے سوا مسئلہ کشمیر دا کوئی حل قبول نئیں، مودی مقبوضہ کشمیر کوں ڄق دی سب توں وݙی جیل ٻݨا چھوڑیے، اسرائیل فلسطینیاں دی نسل کشی کریندا پئے، اصل توجہ اے ہووݨی چاہیدی اے جو اسرائیلی بھیڑیے نیتن یاہو دے ہاتھ کیویں ݙکیے ونڄن، پاکستان اچ قانونی طور تے مقیم غیر ملکیاں کوں ولا نئیں ٻھڄوایا ویندا پیا، اپݨے وسائل غیر قانونی رہݨ آلے غیر ملکیاں تے نئیں اپݨے شہریاں تے خرچ کریسوں، معیشت چنڳی تھیندی پئی اے، امید اے جو شرح سود وی ڳھٹسی، یونیورسٹیاں دے مسلے حل کرݨ دی پوری کوشش اے، داخلیاں کیتے کوٹے دا مسئلہ باہمی مشاورت نال حل کیتا ویسی، وفاقی حکومت آزاد جموں و کشمیر دے طلبا کوں سوکھ ݙیوݨ کتیے پورا ہتھ ونݙیسی۔ اے ڳالھ انہاں آزادجموں و کشمیر دی جامعات دے طلباوطالبات نال الیندے آکھی۔ انہاں آکھیا جو بیرون ملک مقیم کشمیری تحریک آزادی دا اہم حصہ ہین، معاشی مواقع ݙیوݨ کیتے مربوط لائحہ عمل دی لوڑھ اے، روزگار کیتے بیرون ملک ونڄݨ آلیاں کوں منفی اکھ نال نئیں ݙیکھݨا چاہیدا، ایچ ای سی نال میڈیکل اتے ٻعے شعبیاں اچ تعلیم دے ودھارے کیتے ڳالھ تھئی اے ایں سانڳے مربوط منصوبہ ٻݨدا پئے۔ انہاں آکھیا جو یکساں نصاب تعلیم ہک سنجیدہ معاملہ اتے وݙا چیلنج اے جیندے تے تفصیلی غور تے عملدرآمد کیتا ویسی۔ انہاں فزیو تھراپی کونسل اتے نرسنگ کونسل دے معاملے تے آزاد کشمیر حکومت نال ہتھ ونݙاوݨ دا یقین ݙویندے آکھیا جو طبی تعلیم بارے نویں پالیسی ٻݨدی پئی اے ڄیڑھی منظوری کیتے 15 جنوری تئیں کابینہ اچ پیش کیتی ویسی۔
