اسلام آباد۔3مئی (اے پی پی) صدر مملکت ڈاکٹر عارف علوی وفاقی محتسب دے فیصلے دے خلاف سٹیٹ لائف انشورنس کارپوریشن آف پاکستان ولوں دائر ترائے انڄ انڄ اپیلاں کوں مسترد کریندیں ہوئیں شکایت کنندگان کوں 32 لکھ روپے توں ودھ دے انشورنس کلیمز ݙیوݨ اتے 30 ݙینھ دے اندر عملدرآمد دی رپورٹ وفاق محتسب کوں پیش کرݨ دی ہدایت کر ݙتی اے۔ سٹیٹ بینک ڄاݨ ٻجھ تے بیماریاں لکاوݨ دے الزام تے پالیسی ہولڈرز دے ورثاء کوں رقم ݙیوݨ توں انکار کر ݙتا ہئی۔ صدرمملکت اپݨے فیصلے اچ آکھیا جو ترائے معاملیاں اچ سٹیٹ لائف ولوں بدانتظامی ثابت تھئی اے ایں کیتے او ترائے شکایات کنندگان کوں انشورنس کلیمز ادا کرے۔ ایوان صدر دے پریس ونگ موجب ترائیں شکایت کنندگان بشمول ثمینہ شہزادی، محمد محفوظ اتے سیتا دے ٹٻر دے بندے سٹیٹ لائف انشورنس کارپوریشن توں بالترتیب 29 لکھ، 198,290 اتے 192,000 روپے دی انشورنس پالیسیاں ڳھدی ہن۔ پالیسی ہولڈرز دی موت دے بعد سٹیٹ لائف شکایت کنندگان کوں موت دے بیمہ دے کلیمز ݙیوݨ توں انکار کر ݙتا ہئی۔
